कप्तान तथा विकेटकिपर मित भावसारको अविजित शतकीय इनिङ्समा एसीसी यू-१९ एसिया कपमा कुवेतले नेपाललाई एक विकेटले पराजित गरेको छ।

२ सय ४० रनको विजयी लक्ष्य पछ्याएको कुवेतले ४८.५ ओभरमा ९ विकेट गुमाउँदै पूरा गर्‍यो। कुवेतको जितमा कप्तान तथा विकेटकिपर मित भावसारले अविजित शतकीय इनिङ्स खेले। उनले १ सय ४९ बलमा २४ चौका र १ छक्कासहित १ सय ७५ रन बनाए।

जुड साल्दन्हाले २५ रन जोडे। अन्य खेलाडीले दोहोरो अंक जोड्न सकेनन्।

नेपालका स्पिनर बशिर अहमदले १० ओभरमा १ मेडनसहित २९ रन खर्चेर २ विकेट लिए। स्पिनर शेर मल्लले १० ओभरमा ४८ रन खर्चेर २ विकेट लिए यता, गुलशन झाले १० ओभरमा १ मेडनसहित ७० रन खर्चेर ३ विकेट लिए। विवेक यादवले ७।३ ओभरमा १ मेडनसहित ३३ रन खर्चेर २ विकेट लिए।

त्यसअघि शारजाहमा टस हारेर ब्याटिङ थालेको नेपाल ४२।३ ओभरमा २ सय ३९ रनमा अल आउट भएको थियो। नेपालका स्पिन अलराउन्डर बशिर अहमदले सर्वाधिक ५६ बनाए। उनले ६१ बलमा ७ चौका र १ छक्का प्रहार गरे।

यता, मध्यक्रमका ब्याटर विवेक रानामगरले ७१ बलमा ६ चौकासहित ५० रन जोडे।

यस्तै, मोहमद आदील आलमले ४९ तथा शेर मल्लले २१ रन बनाए। दिपेश कँडेल १५, अर्जुन साउद १०, गुलशन झा ७, देव खनाल ५ , सन्तोष कार्की ५ तथा विवेक यादव शून्य रनमा आउट भए। प्रकाश जैसी ५ रनमा अविजित रहे।

कुवेतका मिर्जा अहमदले ५ ओभरमा २२ रन खर्चेर ३ विकेट लिए। अब्दुल सदिकले ७।३ ओभरमा ४२ रन खर्चेर ३ विकेट लिए। हेनरी थोमस र मोहम्मद बास्तकीले २र२ विकेट लिए।

योसँगै समूह बी मा रहेको नेपाल यू-१९ एसिया कप २०२१ मा जितविहीन हुँदै बाहिरिएको छ। नेपाल पहिलो खेलमा बंगलादेशसँग १ सय ५४ रन र दोस्रो खेलमा श्रीलंकासँग ६० रनले पराजित भएको थियो।

प्रतिक्रिया

सम्बन्धित खवर